Aṣọ Rírán Ní Orílè Èdè Nàìjíríà

Aṣọ Rírán Ní Orílè Èdè Nàìjíríà

Lati ọwọ́ Hassan Abdulbaqi

Iṣẹ́ adúláwọ̀ ni iṣẹ aṣọ híhún àti rírán kí àwọn òyìnbò tó dé. Kí òyìnbo tó dé orílẹ̀-èdè Nàìjíríà ni iṣẹ́ aṣọ rírán ti gòkè, kò sì kí ń ṣe àwọn òyínbó ló la adúláwò lójú lóri aṣọ wíwọ̀ àti aṣọ rírán. Kódà, àwọn tí ń gbé ní àfin ọba máa ń ni aránṣọ tiwọn bákan náà ni ti bọ̀rọ̀kíní. Gbogbo aṣọ wọn máa ń wà ní ìbámu pẹ̀lú ibi tí wọ́n fẹ́ wọ irúfẹ́ aṣọ náà lọ àti iṣẹ́ tí wọ́n fẹ́ fi ṣe. Orílẹ̀ èdè Nàìjíríà wà ní òkè dé ibi pé àkọsílẹ̀ wà pé wọn máa ń kó aṣọ híhun lati ọ̀dọ̀ àwa Yorùbá ló sí Yúróòbù bí ọdún ẹgbẹ̀rún mẹrin sẹ́yìn.

Yàtọ̀ sí iṣẹ́ àgbè àti kátà-kárà, Yorùbá gbajúmọ̀ níbi iṣẹ́ ọnà ní sẹ́ntúrì òkandínlógún. Oríṣiríṣi iṣẹ́ ọnà bí aṣọ híhun, àgbẹ̀dẹ, mímọ, ẹní ṣíṣe àti apẹ̀rẹ. Irú ìdàgbasọ́kẹ̀ yìí ní ilapa tó pọ̀ nínu àwọn ìlú Yorùbá àti ìletò. Àwọn ìlú tí irú èléyìí ti gbajúmọ̀ ni Ìsẹ́yìn, Ọ̀yọ́, Ṣaki, Igboho, Èkìtì, Ìjẹ̀bú-Òde, Abẹ́òkúta àti Ìlọrin. Èyí fi ẹsẹ̀ rinlẹ̀ nínu ìwádìí arábìnrin Angela Sancartier (2003) tí ó rí àkọ̀ọ́bẹ̀rẹ̀ iṣẹ́ àdìrẹ dé ìlú Abẹ́òkúta lati bí ọgọ́rún mẹ́ta ọdún sẹ́yìn. Ìdí nìyìí tí àwọn Yorùbá ṣe máa ń sọpé, “kí òyìnbọ́ tó gòkè, kì í ṣe ewé ọ̀gẹ̀dè ni ẹ̀dá fi ń ṣe aṣọ.”

Ìwádìí Barth (1851) fihàn pé aṣọ àdìrẹ àti aṣọ híhun ní ṣíṣe àti ní rírán ti wà ní ìlú Kano ní nǹkán bi 1590. Àǹkàrá pẹ̀lú àwọn aṣọ tí o gbajúgbajà láàrín àwọn Yorùbá. Ayébáyé náà ni ìlo jákán gẹ́gẹ́bí ìwádìí fihàn ní Núpé àti ilẹ̀ Hausa. Ilẹ̀ Hausa, pàápàá jùlọ ìlú Kánò, ni wọn ti máa ń ko àwọn ohun èlò tí àẃọn Yorùbá bùkátà sí. Lati ìbẹ̀rẹ̀ ní ilẹ̀ Yorùbá ni iṣẹ́ àgbẹ̀ tí bẹrẹ̀, tíwọn sí máa ń gbin òwú-akese (Gossypium herbaceum) àti owú Itutu (Gossypium arboretum). Àmọ́, òwú-akese (Gossypium herbaceum) ní ó gbé pẹ́lí jù nítorí ó ní àbùdá àti ṣe aṣọ gidi àti pé kòkòrò kò lè kùn-ún bí ti ìkejì. Baikie (1856) sọpé àwọn Elugwu IIho ní ilẹ̀ Íbò lápaapọ̀ àti àwọn tí ń gbé ní ìletò ní ìlú Ònitsha máa ń hun aṣọ. Àlàyé Equaino lóri ìrírí rẹ̀ ní àárín sẹ́ńtúrì kẹjọdínlógún pẹ́ kìkì iṣẹ́ tí àwọn obìnrin ń ṣe ni aṣọ híhun, tíwọn máa padà pa láró, kíwọn tó sọ di aṣọ wíwọ̀. Nígbàtí ọdún 1800 ń lọ ṣí òpin ní àṣà kí a máa kó aṣọ wọlẹ́ lati òkè òkun ti bẹ̀rẹ̀.

Nígbà tí àwọn òyìnbó dé, ìgbìyàǹjú àti ṣe àmúpé àṣà ìbílẹ̀ ní ìbámu pẹ̀lú ìmúra sọnù. Àṣà àti ìgbàgbọ́ àwọn òyìǹbó lórí ìmúra borí ti àwọn adúláwọ̀, eléyìí kò sì ya ìmúra sí ọ̀tọ̀. Ọ̀nà dí mọ́ àwọn tí ń rán aṣọ ìbílẹ̀ nítorí òkùtà. Aṣọ ìbílẹ̀ sábà máa ń fi irúfẹ́ ikọ̀ tí èèyàn jẹ́, ó sì tún máa ń fi ìjákọ àti ìjábo hàn. Fún àpẹẹrẹ, ìmúra pẹ̀lú wíwọ aṣọ ìbílẹ lè fi èèyàn hàn gẹ́gẹ́bí ará Eastern Nigeria yàtọ̀ sí Northern Nigeria tàbí Western Nigeria. Ní àfikún, ọ̀pọ̀lọpọ̀ àwọn ọmọ Nàìjíríà bẹ̀rẹ̀ sí fi ojú kéré aṣọ ìbílẹ̀. Eléyìí dènà di ìdàgbàsókè aṣọ ìbílẹ̀ títí di ìgbà tí àwọn òyìnbó fi lọ. Kódà, ó ti di aṣa fún àwọn èèyàn lati ṣe ìrìnàjò lọ sí òkè òkun, lati lọ ra aṣọ fún wíwọ̀ àti títà. Eléyìí ń ṣẹlẹ̀ títí wo àsìkò tí orílè Nàìjíríà gba òmìnira títí di ìgbà tí odún 1990 fi ń lọ sí òpin. Láarín ìgbà yíí náà niwọ́n gbé FADAN (The Fashion Designers Association of Nigeria) kalẹ̀ ní odún 1989. Aṣọ ìbílẹ̀ kò sí ní ọjà bí ti tẹ́lẹ̀ mọ́ nítorí ọ̀pọ̀lọpọ̀ ni ó ti fi iṣẹ́ àgbẹ̀ sílẹ̀, èyítí ó fa ìfàsẹ́yìn nínu òwú ṣíṣe.

Níbi 1950 sí 1960, ó fẹ́rẹ̀ lè máà sí obìnrin tí kì í wé gèlè. Àsìkò tí Nàìjíríà gba òmìnira ní 1960 gan-an ni ìlo gèlè gbajúmọ. Oríṣiríṣi àrà ni oníkálukú ń fi gèle e rẹ̀ wé. Gèlè náà ni àwọn èèyan fi gbé oríyìn fún olóògbe Flora Azikwe, ìyẹn aya ààre tẹ́lẹ̀rí, Nnamdi Azikwe. Títí di ìgbà ayé Johnson Aguiyi-Ironsi, Yakubu Gowon, Eko ́ Bridge àti NEPA, ìyẹn àjọ tí ń bójútó iná nígbà náà. Ní nǹkan bí ọdún 1960 àti 1970, àwọn gbajúgbajà aránṣọ pọ̀ jántì rẹrẹ, díè nínu wọn ni Ògúndẹ̀rò, Fágbohùn àti Láí Olúmegbon ní Yába. Èkó àti Ìbàdàn ní ó gbáwájú ní ìdí iṣẹ yìí nítorí ibẹ̀ ni àwọn aránṣọ tíwọ́n lọ kọ́ iṣẹ́ ní ìlú Ọba wà. Ìpadàbọ̀ akọrin Fẹlá Aníkúlápò Kútì náà lapa nínu aṣọ wiwọ awọn tiwọn fẹran rẹ nigba naa. Àwọn aṣọ bí “high waisters”” ṣòkòtò àti ìfi aṣọ orun silẹ lai ka gbajumọ nigba náà. Àwọn àrà aṣọ tí wọ́n pè ní Obey The Wind tabi Keep Lagos Clean náà ti gbòde. Oge náà ni kí awọn okùnrin fi irun wọn sílẹ̀ ní kikun àti wíwọ bàta I Swear to God, èyí tí ó fẹ níwájú, tí ó sì kéré lẹ́yìn

Ìdàgbàsókè tún bẹ̀rẹ̀ sí í bá wíwọ aṣọ ìbílẹ̀ pẹ̀lú ìpolongo tuntun lóri àṣà adúláwọ̀ ní ìgbà tí 1990 gbẹ́nu lọ sí ìparí. Eléyìí sì jẹ́ kí àwọn ìjọba gbà kí àwọn òṣìṣẹ́ ìjọba máa wọ aṣọ ìbílẹ̀ ní gbogbo ọjọ́ Jimo. Ìlo aṣọ ìbílẹ̀ tún gbajúmọ̀ fún ọ̀ṣọ́ ilé, ara abbl. Ọ̀pọ̀lọpọ̀ ti bẹrẹ̀ sí ní fi aṣọ mútìẹ sílẹ̀. Eléyìí fún àwọn ilé iṣẹ́ aránṣọ ní orílẹ̀ èdè Nàìjíríà ní àgbeyèlé wípé ọjọ́ ọla aṣọ rírán bọ wá dára.

Èyí rí bẹ́ẹ̀ nítorí ní ọdún díẹ̀ sẹ́yìn, ọ̀pọ̀lọpọ̀ ètò ìpolówó aṣọ àti ìfaṣọhàn ni ó wáyé lati ọwọ́ àwọn aránṣọ ní orílẹ̀ èdè Nàìjíríà lágbáyé. Kódà, àrà tí àwọn aránṣọ orílẹ̀ èdè Nàìjíríà ń fi aṣọ da ń jẹ́ àríwòye fún àwọn aránṣọ tókùn lágbáyé gégébí Gucci, eléyìí si fi ara hàn nínu bí àfihàn iṣẹ àwọn aránṣọ ṣe ń fi ara hàn nínu magasínì oge lágbáyé. Kárà-kátà àwọn ọjà orílẹ̀ èdè Nàìjíríà ní orí ìtàkùn àgbáyé àti àfihàn wọn ní orí ẹ̀rọ ayélujára náà kò kó kékeré nínu ìdàgbàsókè aṣọ rírán àti aṣọ títà. Lára àwọn nǹkan tí ó tún fa ìdàgbàsókè yìí ni ti ìpolongo kí àwọn èèyàn máa lo àwọn nǹkan orílẹ èdè wọn. Ààjo tí ń ṣe eré tíátà (Nollywood) náà kún ìdàgbàsókè yìí lọ́wọ́.

Ayé àtijọ́ ni àwọn òbí máa ń ti ọmọ wọn sí ìdí iṣẹ́ ìránṣọ nígbàtí wọn kò bá ní owó àti rán wọn ní ilé ìwé. Ìdàgbàsóké ńlá ti dé bá iṣẹ́ yìí, dé bi wípé àwọn akẹ́kọ̀ọ́ tí wọ́n ti ṣe tán ní ifáfitì gan-an ti ń kọ́ iṣẹ́ yìí. Yàtọ̀ sí èyí, àwọn aṣọ ní orílè Nàìjíríà ti gbalẹ̀ débi wípé, káàkiri ayé niwọ́n ti n fi wọ́n hàn. Ìlo àǹkàrá àti léèsì fún aṣọ rírán ní ọ̀nà àràmàǹdà náà sì jẹ́kí iṣẹ́ yìí gbé pẹ́lí si. Oríṣiriṣiri ọ̀nà ni àwọn obìnrin ń gbà wé gèlè wọn báyìí dé bi wípé iṣẹ́ tí ẹlọ̀míràn ń ṣe kò ju ìyẹn (gèlè wíwé) lọ. Gbajúgbajà nínu àwọn aránṣọ ní orílẹ̀ èdè yìí ni: Frank Oshodi, Lánre Oshòdì, Ọmọniyì Makun, Josh Samuel, Mudiaga Enajemo, Bridget Awosika abbl.

Bí a bá fi Nàìjíríà wé ọ̀pọ̀lọpọ̀ orílè èdè adúláwọ̀, a o ri wípé o ti gbòòrò nínu iṣẹ́ yìí nígbàtí ó ṣe àfihàn àwọn iṣẹ́ àti àrà tí ó ti fi aṣọ dá ní Paris ní odún 2000, ìyẹn Nigerian Fashion Show èyítí Legendary Gold ṣe agbátẹrù rẹ̀. Ní ti ṣe tìrẹ, kí n ṣe tèmi, ọ̀pọ̀lọpọ̀ ilé-iṣẹ́ gẹ́gẹ́bí Sophisicate, Rose of Sharon, Vivid Imagination, Jimi King abbl ti bẹ̀rẹ̀ sí í gbé àwọn aṣọ káàkiri ayé, tíwọ́n sì ń wú ọ̀pọ̀lọpọ̀ lórí ní àgbáyé. Oríṣiríṣi ètò ìfaṣọhan ní orílẹ̀ Nàìjíríà àti ní àgbáyé ni orílẹ̀ èdè yìí ti ń gba oríyìn. Ndani, ìyẹn ọjà tí ìjọba kọ sí ìlú Ọba náà pẹ̀lú àwọn akitiyan tí orílẹ̀ èdè yìí ń ṣe lati ri wípé àwọn èèyàn lagbáyé rí iṣé àwon aránṣọ orílẹ̀ èdè yìí. Oríṣiriṣi magasínì ajẹmóge tí ń polówó aṣọ ni ó ti wà ní orílẹ̀ èdè Nàìjíríà. Lara wọn ni Flair West Africa, Genevieve, TW àti Arise.

Ní adúrú àwọn àgbéga yìí, ọ̀pọ̀lọpọ̀ ìpèníjà ní ó ṣì ń kọjú àwọn aránṣọ ní orílẹ̀ èdè Nàìjíríà, ṣé èèyàn ò kúkú lè rìn, kí orí rẹ̀ máà mì. Lára àwọn ìpèníjà yìí ni: àìsí èlò fún ṣíṣe aṣọ ìbílẹ̀ kò pọ̀ nílè, àísí owó fún àwọn ìwádìí tó lè mú ìyípadà àti ìdàgbàsókè wá fún iṣẹ́ yìí, wàhálà iná, aìdáàbòbò tó péye pèlú àwọn òfin tó lè de àwọn oníṣẹ́ aránṣọ pèlú ìṣòro àìlówó lọ́wọ́ lati ra àwọn ẹ̀rọ ìgbàlódé.

Àwọn Ìwé Atọ́kasí

Helen J.A. 2006. Patternmaking for Fashion Design. London: Pearson

Ltd.

John, G & Bryan, S. 1999. World Textiles: A Visual Guide To The Traditional

Techniques. London: Thames & Hudson.

https://en.m.wikipedia.org/wiki/History_of_clothing_and_textiles March 3rd, 2016

https:// oldnaija.com/2015/07/01/fashion-in-early-nigeria/ May 5^th, 2016.

Stay Connected

New

Ìyàtọ̀ Láàrín Télò Àti Dìsáínà

Aṣọ Rírán Ní Orílè Èdè Nàìjíríà

‘RESKET YOURSELF’: JENIFA’S ENGLISH AND INSERTION

‘INTAGRAM’: JENIFA’S ENGLISH AND DELETION

‘BAD SHAID’: JENIFA’S ENGLISH AND DE-AFFRICATION

JENIFA’S ENGLISH UNDER PHONOLOGICAL SCRUTINY

Aṣọ Rírán Ní Orílè Èdè Nàìjíríà

Flying Colours Crew